नेम्वाङले भने एनआरएनले दोहोरो नागरिकता पाउँछन्।

काठमाडौं, २५ फागुन  : संविधानसभाका अध्यक्ष सुवासचन्द्र नेम्वाङले गैरआवासीय नेपालीले दोहोरो नागरिकता पाउने बताएका छन् । गैरआवासीय नेपालीलाई दोहोरो नागरिकता दिने कुरा संविधानमै लेख्न दलहरुका बीचमा सहमति भैसकेको उनको भनाइ छ ।गैर आवासीय नेपाली संघको भवन शिलान्यास समारोहमा बोल्दै सभाध्यक्ष नेम्वाङले सहमतिसहित उक्त प्रश्ताव मस्यौदा समितिमा पुगिसकेको बताए । “पहिला गैरआवासीय नेपालीलाई परिचयपत्र दिनुपर्छ भन्दा विवाद भएको थियो । त्यतिबेला सबैको मानसिकतामा धनी मानिसहरु सुख सयलको खोजीमा विदेशीएका हुन्, उनीहरुलाई किन परिचयपत्र दिनु भन्ने थियो” उनले भने, “एनआरएनलाई दोहोरो नागरिकता दिने कुरा संविधानमा उल्लेख गर्ने भनेर पहिलो संविधानसभामै सहमति भइसकेको हो । दोस्रो संविधानसभामा पनि दलहरुका बीचमा सहमति भएर मस्यौदा समितिमा पुगिसकेको छ । तपाईहरु ढुक्क हुनुस् यो कुरा संविधानमा उल्लेख हुन्छ ।”
भारत र चीनले गैरआवासीय नेपालीहरुसँग भएको सीप र पुँजीको सहि परिचालन गरेर आफ्नो देशलाई सम्बृद्ध बनाएको उदाहरण दिँदै सभाध्यक्ष नेम्वाङले नेपालको सम्बृद्धिका लागि पनि एनआरएनको भूमिका महत्वपूर्ण रहेको उल्लेख गरे । उनले भने, “दल र नेताले आफ्ना प्रतिवद्धता पुरा गरे वा गरेनन् भनेर खोजी अहिले भैरहेको छ । केन्द्रीय कार्यालय भवन बनाउनका लागि एनआरएनले प्रतिवद्धता अनुरुप १९ करोड संकलन गर्नु भनेको दलहरुलाई खबरदारी गरेको मैले ठानेको छु । तपाईहरुले नेपाल बाहिर एउटा सिङ्गो नेपालको प्रतिनिधित्व गर्नु भएको छ ।”
एनआरएन अन्तर्राष्ट्रिय समन्वय परिषदका अध्यक्ष शेष घलेले वैदेशिक रोजगार कल्याणकारी कोष स्थापनका लागि सरकारले तत्परता नदेखाएको बताएका छन् । नेपाल सरकारले यस आर्थिक वर्षको बजेट वक्तव्यमार्फत कोषका लागि म्याचिङ फण्ड बिनियोजन गरेको घोषणा गरेकोमा खुसी व्यक्त गर्दै उनले छिट्टो सम्झौता गर्न आग्रह गरेका छन् ।
उनले भने, “वैदेशिक रोजगारीको क्रममा समस्यामा परेका नेपालीलाई राहत दिनका लागि हामीले सरकारसँगको साझेदारीमा वैदेशिक रोजगार कल्याणकारी कोष स्थापना गर्न चाहेका हौं । यसका लागि एउटा देशले मात्रै लडेर सम्भव छैन सबै देशको संयुक्त पहल चाहिन्छ । सरकारले यस आर्थिक वर्षमा म्याचिङ फण्डका लागि बजेट पनि छुट्यायो । अब छिट्टै सरकार र एनआरएनका बीचमा सम्झौता हुनु जरुरी छ ।”
नेपाल उद्योग वाणिज्य महासंघका अध्यक्ष प्रदिपजङ्ग पाण्डेले मुलुकमा लगानीको वातावरण बनेको बताउँदै ढुक्क भएर लगानी गर्न आग्रह गरे । उनले भने, “महासंघको पहलमा २३ वर्षदेखि अवरुद्ध रहेको औद्योगिक व्यबसाय ऐनलाई पास गराउन पहल भैरहेको छ । अरु कानुन ऐन तथा नियमलाई समयानुकुल परिमार्जनका लागि दबाब दिइरहेका छौं । वैदेशिक लगानी नीति समेत आइसकेकोले ढुक्क भएर नेपालमा लगानी बढाउनुस् यसमा महासंघको पूर्ण साथ र सहयोग रहनेछ ।”संघका निवर्तमान अध्यक्ष जीवा लामिछानेले केन्द्रीय कार्यालय भवनमाथि अपनत्व भएजस्तै गरी संसारका ७० देशका संगठित नेपालीहरु आफ्नो जन्मभूमीलाई सम्बृद्ध बनाउन मन, वचन तथा कर्मका साथ लागिरहेको बताए